"Səlibçi birlik" Azərbaycanın uğurlarını həzm edə bilmir

Azərbaycanın zəngin enerji resursları, müstəqil siyasəti, artan nüfuzu, hərbi gücü ilə dünyanın diqqət mərkəzində olması Qərbdəki bəzi dairələri narahat etməkdədir. Bu səbəbdən də bəzi qüvvələr Avropa İttifaqı, Avropa Şurası Parlament Assambleyası və digər təsisatlar vasitəsilə ölkəmizə hücumlar təşkil edirlər. 
Demək olar ki, "xristian klubu"na çevrilən bu təşkilatlar sözdə Azərbaycanın müstəqil siyasətini dəstəkləsələr də, Avropanın enerji təhlükəsizliyinin təminatı məsələsində ölkəmizə "elçi düşüb" təşəkkür etsələr də, yenə öz məkrlərindən əl çəkə bilmirlər.  
Son müşahidələr göstərir ki, bəzi dairələr, konkret olaraq Avropa Parlamenti bu gün Azərbaycanda vətəndaş qarşıdurmasının olmasını, tez-tez hakimiyyətin dəyişməsini, ölkəmizin asılı, vassal vəziyyətinə düşməsini arzulayır. Bu qərəzli yanaşma isə Azərbaycana qarşı səlib yürüşünün davamı kimi qiymətləndirilməlidir. Əminliklə deyə bilərik ki, müharibələrə, işğallara, insan iztirablarına, ölkələrin ərazi bütövlüyü və suverenliyinə etnik və dini simpatiya əsasında yanaşan irqçi, islamofob, azərbaycanofob Avropa Parlamenti Avropanın utanc mənbəyidir. Bu təşkilat ədalətsizliyi, ikiüzlülüyü ilə tarixdə ləkə kimi qalacaq.
Azərbaycanın bu qurumun qarşısında heç bir öhdəliyi yoxdur. Yaxşı olar ki, bu təşkilat Avropada tüğyan edən islamofobiya, antisemitizm, miqrantların hüquqlarının kütləvi və kobud surətdə pozulması və digər bu kimi köklü problemlərlə məşğul olsun. 
Amma bütün bunların əvəzində Qərb bu gün Azərbaycanda xaos, anarxiyanın yaşanması üçün yeni "5-ci kolon" axtarışındadır. Vaxtilə onlara buyruq qulu kimi xidmət edən "sapı özümüzdən olan baltalar", yəni məhv edilmiş "5-ci kolon"un sıradan çıxması səbəbindən qoca qitə Azərbaycanın daxilində heç bir qarşıdurma, araqarışdırma hallarını həyata keçirə bilmir. Bu da təbii ki, onları çox məyus edir. 
Bir tərəfdən "5-ci kolon" axtarışında olan dairələr, digər tərəfdən Ermənistanın sülh müqaviləsini imzalamasına imkan vermirlər. Çünki yaxşı bilirlər ki, əgər bu, baş versə, regiondakı maraqları tamamilə məhv olacaq. Başa düşürlər ki, Cənubi Qafqazda sülh olarsa, ölkələr təhlükəsizliklərini gücləndirərlərsə, başqa qüvvələrin buraya girməsi mümkün olmayacaq. 
Həmin dairələr unutmamalıdırlar ki, bu gün Azərbaycanla hədə, təhdid dili ilə danışmaq mümkünsüzdür. Prezident İlham Əliyevin dediyi kimi, kimsə artıq Azərbaycanla hədə-qorxu, təhdid dili ilə danışa bilməz. Aİ-nin, AP-nin, AŞPA-nın hər hansısa "qətnaməsi", "qərarı" ilə Azərbaycana təsir göstərməsi qeyri-mümkündür. Çünki Azərbaycan güclüdür və hər zaman ədalətlidir. Ədalət isə daim zəfər çalır.  

Rəşad BAXŞƏLİYEV,
"Azərbaycan"