Reyhan - min bir dərdə şəfa verən möcüzəvi bitkidir.

AZƏRTAC Yıldırım Beyazıt Universiteti Tibb Fakültəsinin professoru, bitkilər üzrə mütəxəssis Aysun Bay Karabulutun reyhanın faydası haqqında araşdırması əsasında topladığı məlumatları təqdim edir. Alim bildirir ki, 2500 ildir Yaxın Şərq və Aralıq dənizi hövzəsində dərman məqsədilə becərilən reyhan bitkisi insan sağlamlığı üçün şəfaverici xüsusiyyətlərə malikdir. O qeyd edib ki, reyhan acı, kəskin, lakin çox ətirli bir bitki növüdür, vətəni Hindistandır. Bu bitki növü yalnız qida baxımından deyil, ətriyyat və tibbi baxımdan da olduqca əhəmiyyətlidir. Reyhan bitkisi antibakterial olduğu üçün zərərli bakteriyaları təmizləyir, dəridə sızanaq əmələ gəlməsinin qarşısını alır və beləliklə, onun sayəsində hamar bir dəriyə sahib olmaq olur.

Reyhan tərləmənin qarşısını alır və bədəndəki pis qoxuları yox etmək iqtidarındadır. Bundan başqa, reyhan təsirli qoxusu ilə zərərli həşəratları və zərərvericiləri dəf edir, tətbiq olunduğu yerin havasını təravətləndirir, təzələyir və yumşaldır. Sakitləşdirici keyfiyyətə malikdir, mədəyə faydalıdır. Revmatizm, ürək döyüntüsü və hemoroid kimi xəstəliklərin müalicəsində istifadə edilən bu bitki immunitet sistemindən həzm sisteminə qədər bir çox sağlamlıq problemi ilə mübarizə aparır. Metabolik fəaliyyətləri dəstəkləyir, immunitet sistemini gücləndirir, orqanizmdəki turşuları tarazlaşdırır (məsələn, ishal, qastrit və xoralar, ürəkbulanma, həzmi gücləndirir), yoluxucu xəstəliklərin qarşısını alır, soyuqdəymə ilə mübarizə aparır və gözləri qoruyur. Reyhan A vitamini ilə zəngin olan faydalı bir bitkidir.

“Radiasiyaya qarşı qoruyucu təsiri olan və xərçəng hüceyrələrinin çoxalmasının qarşısını alan reyhanın insan sağlamlığına faydaları, şübhəsiz ki, bununla məhdudlaşmır. Bu bitki sinir sistemini tənzimləyir və stresi aradan qaldırır. Bundan başqa, narahatlıq və miqrenlərə qarşı faydalıdır. O, cansıxıcılığı aradan qaldırır, depressiv əhval-ruhiyyənin qarşısını alır, həyat sevincini artırır. Ürəyə rahatlıq bəxş edir, yuxusuzluq və zehni işdən yaranan yorğunluğu aradan qaldırır. Saç tökülməsinə qarşı təsirlidir və saçların erkən ağarmasının qarşısını alır. Reyhan bitkisindən hazırlanan şərbət qan dövranını sürətləndirir, ürək-damar sağlamlığını təmin edir, trigliserid və xolesterin səviyyəsini aşağı salır, qan azlığı ilə mübarizə aparır, qan şəkərinin düşməsinin, həmçinin başgicəllənmə və ürəkgetmənin qarşısını alır. Bundan əlavə, şəkərsiz hazırlanmış reyhan suyu ilə qarqara etmək ağızdakı yaraları sağaltmaqla yanaşı, ağız qoxusunu da yox edir, əlavə olaraq siqareti tərgitməyə yardımçı olur. Süd verən anaların südünü artırır, qaraciyər və böyrək sağlamlığına faydalıdır. Öskürəyin müalicəsi üçün tövsiyə olunan reyhan, arı sancmalarına qarşı da müalicəvi əhəmiyyətə malikdir. Bu bitki, piyləri yandırmaq xüsusiyyətinə də malikdir, xüsusilə reyhan çayı arıqlamağa kömək edir. Ancaq həddindən artıq istifadə böyrəkləri yorur, qaraciyəri zədələyə bilir”, - deyə A.B.Karabulut əlavə edib.