“OpenAI” şirkəti tapşırıqları məntiqi yolla həll etmə bacarıqlarına sahib “o1” adlı süni zəka modelini təqdim edib. Yeni süni zəka modeli öncəkilərdən fərqli olaraq, qəliz tapşırıqları daha sadə addımlara ayıraraq, müxtəlif üsulları analiz edərək və öz səhvlərini düzəldərək insan düşüncəsi prosesini imitasiya edə bilir. Sözügedən süni zəka modeli müxtəlif testlərdə və yarışmalarda peşəkar insanların nəticələri ilə müqayisə oluna biləcək üstün nəticələr sərgiləyib. “o1” İnformatika üzrə Beynəlxalq Olimpiadada 49-cu yeri tutub və proqramlaşdırma üzrə Codeforces adlı yarış platformasındakı insanların 89 faizini geridə qoyub. O, ABŞ Riyaziyyat Olimpiadasının seçmə mərhələsində ən istedadlı tələbələr üçün nəzərdə tutulmuş tapşırıqların öhdəsindən gələrək, ABŞ-nin 500 ən yaxşı tələbəsi siyahısına daxil olub.

“o1” təbiət elmlərində, kimya, fiziki və biologiya kimi sahələrdə bilikləri qiymətləndirməyə imkan verən “GPQA diamond” adlı qəliz test çərçivəsində həkimlərin və elmlər doktoru adına namizəd olan şəxslərin nəticələrini geridə qoyub. Şirkətdən bildirilib ki, sözügedən süni zəka modeli bəzi tapşırıqların öhdəsindən yüksək səviyyədə ixtisaslaşmış şəxs səviyyəsində gələ bilir. “o1” ən optimal nəticələrin əldə olunması üçün qərarların qəbul edilməsi üsulu üzrə özü-özünü təlimatlandıraraq fikirlər zəncirini təkmilləşdirə bilir. Yeni süni zəka modeli məntiqli düşüncəni əhatə edən tapşırıqların çoxunda “GPT-4o”nu geridə qoysa da, ondan ləng çalışır və daha baha başa gəlir.

 “OpenAI” yeni süni zəka modelinin “o1-preview” adlı ilkin versiyasını “ChatGPT” tərkibində artıq istifadəyə verib. Sadələşdirilmiş versiya “ChatGPT”dən pulsuz şəkildə istifadə edənlərə istiqamətlənib.

Ülkər XASPOLADOVA,

“Azərbaycan”