BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29), sadəcə, qlobal ekoloji tədbir deyil. O, həm də bəşəriyyəti rahatsız edən məsələlərin həlli üçün mühüm addımların atılacağı böyük toplantı olacaq. 
İqlim dəyişmələri bütün dünya üçün kifayət qədər həssas mövzu olduğundan COP29 "yaşıl enerji"yə keçidin sürətlənməsi üçün geniş debat və fəaliyyət platformasına çevriləcək. Bu o deməkdir ki, Azərbaycan iki həftə nəhəng bir vəzifəni çiyninə götürəcək. Həmin vəzifəni yerinə yetirmək üçün COP29 komandası ardıcıl olaraq Bakıda və regionlarda tədbirlər keçirir. Tədbirlərdə COP29-un əhəmiyyətini özündə əks etdirən mövzular müzakirə edilir, hazırlıqlardan söz açılır, vəzifələr müəyyənləşir, təklif və təşəbbüslər irəli sürülür.
Azərbaycanın  qısa müddətdə  COP19-la bağlı  hazırlıqları  beynəlxalq auditoriya və  BMT-nin İqlim Dəyişmələri üzrə Çərçivə Konvensiyası səviyyəsində razılıqla qarşılanır, təqdir olunur. Bir neçə gün əvvəl COP29 sədrliyinin Bakı Qlobal İqlim Şəffaflığı Platformasını (BTP) işə salması  BMT-nin İqlim Dəyişikliyi üzrə Çərçivə Konvensiyasının icra katibi Simon Stiell tərəfindən razılıqla qarşılanıb. Bu o deməkdir ki, Azərbaycan üzərinə düşən işin öhdəsindən bacarıqla gəlir, tərəflər arasında qarşılıqlı inam və etibar yaradır. 
İqlim şəffaflığı üzrə Bakı Qlobal Platforması Azərbaycanın təşəbbüsü ilə yaradılıb. Qlobal əhəmiyyətli bu platforma sübut edir ki, Azərbaycan artıq beynəlxalq məsələlərin həllində əsas ölkələrdən biridir və dünya bunu qəbul edir. Dünyada səhralaşmanın və  quraqlığın qarşısının alınması üçün yaşıllığın salınması, su ehtiyatlarından düzgün istifadə edilməsi mühüm şərtdir. Sudan təkrar istifadə, su hövzələrinin çirklənməsinin qarşısının alınması da hazırkı həssas dönəmdə çox vacib vəzifədir. Daha sonra istixana-qaz emissiyalarının tətbiq edilməsi üçün karbon tullantılarının atmosferə buraxılmasının həcmi azaldılmalıdır. Müxtəlif ölkələrdə fəaliyyət göstərən nəhəng sənaye müəssisələrinin sayı da azaldılmalı və "yaşıl texnologiya"ya üstünlük verilməlidir. Bu sadalananlar və sadalanmayan digər məsələlər həm bütövlükdə COP29-un, həm də  əlahiddə olaraq Bakı Qlobal İqlim Şəffaflığı Platformasının gündəliyindədir. 
Xeyli vaxt idi  ki, COP29 komandası texnoloji innovasiya və qlobal məzmun tərəfdaşlıqlarının birləşməsini əks etdirən Yaşıl Zona üzərində işləyirdi.  Artıq hazır olan Yaşıl Zona şəxsi görüş və konfrans meydançası kimi sifariş üçün əlçatandır. Məlumat üçün bildirək ki, Yaşıl Zona müxtəlif maraqlı tərəflərin - dövlət və özəl sektor, media işçiləri, alimlər, gənclər, yerli icmalar, QHT-lər, vətəndaş cəmiyyəti və rəsmi Mavi Zona nümayəndələrini də əhatə edən geniş iştirakçı auditoriyasının bir araya gələrək ünsiyyət qura biləcəyi məkandır. COP29 komandası  tərəfindən təşkil və idarə olunan Yaşıl Zona müxtəlif, həm də iştirakçıların öz baxışlarını bölüşə bilmələri üçün dinamik platformadır. Bu zona cari innovasiyaların, eləcə də iqlim dəyişmələri ilə mübarizə üzrə potensial həll variantlarının təqdim edilməsinə dair müzakirələr, panellər və əyani nümayişlər üçün mərkəz funksiyasını yerinə yetirir.  Qeyd edək ki, pavilyonlardan və sərgi stendlərindən ibarət,  ümumi sahəsi 36 min kvadratmetrdən çox olan Yaşıl Zona Tərəflər Konfransının rəsmi görüşlərinin keçiriləcəyi Mavi Zonadan cəmi bir neçə yüz metr aralıda yerləşir.
COP29 Əməliyyat Şirkətinin məlumatına görə, Yaşıl Zonada həm Azərbaycandan, həm də dünyanın müxtəlif ölkələrindən bizneslərin geniş çeşidini təmsil edən aparıcı özəl sektor nümayəndələrinin, yerli və beynəlxalq hökumət təşkilatlarının və QHT-lərin iqlim fəaliyyətləri ilə bağlı ən son məhsullar, həll variantları və layihə üzrə işlərin gedişi təqdim və nümayiş olunacaq. Bura nüfuzlu spikerlər, xüsusi seminarlar, sərgi zonaları, həmçinin yaradıcı şəxslər üçün ayrılmış studiyalar, şəbəkələşmə sahələri vasitəsi ilə həm gənclər, həm də digər iştirakçılar arasında əlaqələndirmənin gücləndirilməsinə xidmət edən innovativ "ekstremal görüş" yeri olacaq. Bunlardan başqa, ictimaiyyət iqlim liderlərini və tərəfdaşları dinləmək, iqlim söhbətinə öz səslərini vermək üçün Yaşıl Zonada iştirak etməyə dəvət ediləcəklər.
 
Züleyxa ƏLİYEVA, 
"Azərbaycan"