Göygöl Rayon İcra Hakimiyyətində yüksək balla ali təhsil müəssisələrinə, o cümlədən bu il fəaliyyətə başlayan Qarabağ Universitetinə qəbul olunan gənclərlə görüş keçirilmişdir.
Görüşü giriş sözü ilə rayon icra hakimiyyətinin başçısı Elvin Paşayev açaraq tələbə adını alan gəncləri təbrik etmiş,  onların bu uğurlarında pay sahibi olan valideynlərinə və müəllimlərinə minnətdarlığını bildirmişdir. Ölkəmizdə təhsilə verilən önəmdən danışan RİH-in  başçısı vurğulamışdır ki, Ümummilli Lider Heydər Əliyevin genişmiqyaslı fəaliyyətində təhsilin inkişafı hər zaman prioritet sahə kimi əsas yer tutmuşdur: "Onun uzaqgörənliklə söylədiyi konseptual fikirlər və ideyalar, tarixi tövsiyələr bu gün də ölkəmizdə təhsil islahatlarının əsas istiqamətlərinin müəyyənləşdirilməsinə öz töhfəsini verir". 
Ümummilli Lider Heydər Əliyev tərəfindən təməli qoyulmuş inkişaf strategiyasının Prezident İlham Əliyev tərəfindən davam etdirildiyini deyən E.Paşayev onu da diqqətə çatdırmışdır ki, bu gün Azərbaycanın sosial-iqtisadi inkişafında elm və təhsilin rolu böyükdür. 
Görüşün sonunda RİH-in başçısı tələbə adını qazanan məzunların milli-mənəvi dəyərlərə sadiq, vətənpərvər, savadlı gənclər olaraq ölkəmizin, o cümlədən Göygöl rayonunun sosial-iqtisadi və mədəni həyatında fəal iştirak etmələrini arzulamış, onlara rayon icra hakimiyyətinin fəxri fərmanlarını və xatirə hədiyyələrini təqdim etmişdir.
Qeyd edək ki, bu il Göygöl rayonu üzrə 16 abituriyent 600-dən yuxarı bal toplayaraq ali məktəblərə, o cümlədən 12 nəfər yüksək balla Qarabağ Universitetnə daxil olmuşdur.