Şabranlı fermerlər hər il bol məhsul yetişdirməyə və bununla həm özlərinin güzəranını yaxşılaşdırmağa, həm də ölkə əhalisinin yerli məhsullarla təminatına töhfə verməyə çalışırlar. Bunu aqrar sektor üzrə son illərin nəticələri aydın göstərir. 
Hazırda rayonun təsərrüfatlarında məhsul yığımının qızğın vaxtıdır. Məlumat üçün bildirək ki, Şabran rayonu ərazisində 143,9 hektarda xurma, 135,9 hektarda nar, 524,5 hektarda alma, 161,6 hektarda armud, 205 hektarda heyva becərilir. Yay mövsümündə 93,8 hektardan ərik, 34,4 hektardan albalı, 410,9 hektardan şaftalı, 97,4 hektardan gavalı, 62,1 hektardan alça və 615,3 hektardan gilas dərilərək ölkə bazarlarına göndərilib. Əvvəlki illərə nisbətən əldə edilən gəlir bir neçə dəfə çox olduğu üçün növbəti mövsümdə bu bitkilərin sahələrinin genişləndirilməsi, yəni yeni bağların salınması nəzərdə tutulub.
Şabranda payız meyvələri də aqrotexniki qaydada becərilir. Rayonda 148,1 hektar badam, 1170,31 hektar fındıq, 701 hektar qoz və 1251 hektar müxtəlif meyvələr olmaqla, cəmi 4000,1 hektar bağ var. Bunlardan əlavə, 30,7 hektar giləmeyvə və 405,9 hektar üzüm bağı da mövcuddur. Hazırda bağlarda məhsulun yığılması və tədarükü davam edir. 
Şabran üzümünün süfrəmizdə öz yeri var. Müşahidə etmişik ki, rayona təşrif buyuran qonaqlar geri dönərkən mütləq kəhrəba salxımlı Şabran üzümü də alıb aparırlar. Məhsuldarlıq bu il də pis deyil. Rayonun üzümçüləri indiyədək 405,9 hektardan 994,3 ton məhsul götürüblər. Bu, hər hektardan 24,5 sentner üzüm deməkdir. Mütəxəssislər bu nəticənin normal olduğunu deyirlər. 
Yaxın gələcəkdə yeni üzüm plantasiyalarının salınacağı da gözlənilir. Sahibkarlar bununla ölkə ərazisində üzümə olan ehtiyacın ödənilməsinə öz töhfələrini vermək niyyətindədirlər. Onu da qeyd edək ki, rayonun bir sıra kəndləri ayrı-ayrı məhsullar, o cümlədən üzüm yetişdirilməsi üzrə ixtisaslaşıblar.
Şabranda tərəvəz, bostan, köklü meyvəlilər də becərilir. 553 hektarda yetişdirilən bu məhsulların da yığımı davam edir. Rayon üzrə 245 hektar pomidor da əkilib. İndiyəcən məhsuldarlıq 207,8 sentnerdir. Bu yerlərin iqlimi pomidorun becərilməsi üçün münasib olduğundan hər bir şabranlının həyətyanı sahəsində də bu məhsula rast gəlmək mümkündür. Şabran pomidoru tələbat böyük olduğundan yerdə qalmır. 

Akif ƏLİYEV,
"Azərbaycan"