Respublikamız çox mötəbər beynəlxalq tədbir ərəfəsindədir. İki aydan sonra Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) keçiriləcək. Bu beynəlxalq tədbir diqqəti iqlim məsələlərinə yönəltməklə yanaşı, həm də Azərbaycanı bir daha dünyaya tanıdacaq, respublikamızın inkişaf nümunələrinin möhtəşəm təqdimatına çevriləcək.

Məkrli planlar həmişə iflasa uğrayıb

Görünən həm də odur ki, Azərbaycanın uğurları, qlobal səviyyədə aktuallıq kəsb edən problemlərin həllinə verdiyi dəyərli töhfələr Qərbin erməni təəssübünü çəkən, anti-Azərbaycan mövqeli təşkilatlarının, o cümlədən özünü siyasətçi hesab edən siyasi dəllallarının kürkünə birə salıb. Fransanın Avropa və Xarici İşlər Nazirliyinin Azərbaycana dair açıqladığı səyahət xəbərdarlığı, Almaniya parlamentinin deputatı Frank Şvabenin ölkəmizə qarşı əsassız və qərəzli açıqlamalarla çıxış etməsi bunu bir daha təsdiq edir.
Qərbdən ölkəmizə qarşı bu tipli hücumların olması, əslində, bizim üçün yenilik deyil.  Azərbaycanın nailiyyətləri, inkişaf etməkdə olan dövlətlərin sırasında öncüllərdən olması, müstəqil siyasət yürütməsi, hüquqi və demokratik inkişaf yolunda qazandığı uğurlar uzun müddətdir ki, Qərb siyasi dairələrində qısqanclıq və xəbisliklə qarşılanır. Xüsusən Azərbaycanın beynəlxalq səviyyəli tədbirlərdə uğurlara imza atdığı dönəmlərdə ölkəmizə qarşı qarayaxma kampaniyalarının şahidi olmuşuq. Məsələn, Bakıda 2012-ci ildə keçirilən "Avroviziya" müsabiqəsi, 2015-ci ildə keçirilən I Avropa Oyunları, 2017-ci ildə keçirilən IV İslam Həmrəyliyi Oyunları zamanı Qərb siyasi mərkəzləri Azərbaycanın uğurlarına kölgə salmaq üçün çıxmadıqları oyunlar qalmamışdı. 
Ölkəmizə qarşı bu məkrli fəaliyyət demək olar ki, bütün illərdə fasiləsiz olaraq davam etdirilib. Azərbaycan torpaqlarının işğal edilməsinə, bir milyondan artıq soydaşımızın qaçqın və məcburi köçkün vəziyyətinə düşməsinə laqeyd və biganə qalan Qərb təşkilatları erməni lobbisindən aldıqları sifarişlər əsasında ölkəmizə qarşı əsassız və qərəzli fəaliyyət ortaya qoyublar.

Azərbaycanı yolundan döndərmək mümkün deyil 

Azərbaycan güclü dövlətdir və ona görə də bu riyakarlıqlar Azərbaycanı yolundan döndərə və öz milli maraqlarını təmin etməyə əngəl ola bilməyib.  Qərbin bəzi dairələri Azərbaycanı nə qədər hədəfə alsalar da, respublikamız uğurlarının sayını ildən-ilə artırıb. 4 il əvvəl Vətən müharibəsində qazandığımız qələbə, bir il əvvəl isə antiterror tədbirlərinin nəticəsi olaraq torpaqlarımızda erməni separatizminə son qoyulması ilə Azərbaycan həm də Qərbin bəlli siyasi dairələrini cəzalandırdı. 
Başda Fransa olmaqla Qərbin erməni təəssübünü çəkən dairələrinin Azərbaycanın qələbəsini və erməni separatizminə son qoymasını həzm edə bilmədikləri məlumdur. Ona görə də son dörd ildə Avropa Parlamenti ölkəmizə qarşı saysız-hesabsız qətnamələr qəbul edib. O cümlədən AŞPA-da Almaniyadan olan deputat F.Şvabenin müəllifliyi ilə ölkəmizə qarşı həyata keçirilən məkrli əməllər də Qərbin Azərbaycana qarşı həm qərəzinin, həm də respublikamızın uğurlarını, sabitliyini, inkişafını qəbul edə bilməməsinin göstəricisidir.
Davamlı şəkildə Azərbaycan əleyhinə açıqlamalar verən F.Şvabe son çıxışlarında yenidən ölkəmizi "siyasi məhbusların" azad olunmasına çağırmışdır. Əslində, Azərbaycanda siyasi məhbusun olmadığı, siyasi fəaliyyətinə görə kimsənin həbsə atılmadığı Qərb siyasi dairələrinə, habelə F.Şvabenin özünə də məlumdur. Sadəcə "insan haqları", "demokratiya" və "siyasi məhbus" ifadələri Qərb dairələrinin leksikonuna hopub və bununla hədəf götürdükləri dövlətimizə təzyiq edə biləcəklərini düşünürlər. Lakin unudurlar ki, Azərbaycanla təzyiq dilində danışmaq, onu öz yolundan döndərmək mümkün deyil. 
F.Şvabe, əslində, Azərbaycanın Qarabağ zəfərini həzm edə bilməyən Almaniya və Fransanın oyuncağına çevrilib. Şvabe kimiləri sadəcə aldıqarı təlimatları yerinə yetirən xırda məmurlardır. Qərb siyasi elitası onlardan müəyyən müddət istifadə edib sonra bir tərəfə atırlar. Necə ki, bundan əvvəl də Şvabe kimi neçələri ölkəmizə qarşı min hoqqalardan çıxmışdılar və indi onları Avropada belə xatırlayan yoxdur.

Rəşad CƏFƏRLİ,
"Azərbaycan"