Bu təsisat Azərbaycana qarşı qarayaxma kampaniyasından əl çəkmək istəmir

"Avropa Şurasının İşgəncənin və Qeyri-insani, yaxud Ləyaqəti Alçaldan Rəftar və ya Cəzanın Qarşısının Alınması üzrə Komitəsinin 2 ay əvvəl, 3 iyul tarixli ictimai bəyanatının Avropa İttifaqı tərəfindən yenidən gündəmə gətirilməsi açıq qərəzdir və qurumun Azərbaycana qarşı qarayaxma kampaniyasından əl çəkmək niyyətində olmadığını göstərir. Təbii ki, Azərbaycan üçün Avropa İttifaqının bu mövqeyinin heç bir siyasi-hüquqi əhəmiyyəti yoxdur və biz təşkilatın bu davranışını qeyri-obyektiv və ədalətsiz çirkab kampaniyasının bir hissəsi, habelə Avropa İttifaqının özünü ifşası kimi qəbul edirik". 
Bu sözləri "Azərbaycan" qəzetinə hüquqşünas Bəhruz Məhərrəmov deyib. O bildirib ki, Avropa İttifaqının 2 ay əvvəlki bəyanata istinad etməsi həm də onu göstərir ki, bu təsisat Azərbaycanın qlobal miqyasda artan imkan və nüfuzu, habelə dəyişən yeni reallıqlar və Prezident İlham Əliyevin formalaşdırdığı konfiqurasiya fonunda, sözün əsl mənasında, aciz qalıb. Əks halda Avropa Şurasının heç bir reallığı əks etdirməyən və 2024-cü ilin yanvarında AŞPA tərəfindən Azərbaycan nümayəndə heyətinin səlahiyyətlərini ratifikasiya etməmək barədə qərəzli qərarının davamı kimi qəbul edilən, iyul ayının 4-də Azərbaycanın aidiyyəti strukturları tərəfindən bənd-bənd cavablandırılan və saxta əsaslara söykənməsi sübut edilən bir sənədə istinad etmək məcburiyyətində qalmazdı. Azərbaycan hökuməti Avropa Şurasının İşgəncənin və Qeyri-insani, yaxud Ləyaqəti Alçaldan Rəftar və ya Cəzanın Qarşısının Alınması üzrə Komitəsinin ölkəmizlə bağlı ictimai bəyanatından təəssüfünü ifadə etmişdi. Azərbaycan haqlı olaraq hesab edirdi ki,  "İşgəncənin və qeyri-insani və ya ləyaqəti alçaldan rəftarın və ya cəzanın qarşısının alınması haqqında" Avropa Konversiyasının tələbinə zidd olaraq Bakının rəsmi razılığı olmadan 2022-ci ildə Azərbaycana edilən xüsusi səfər və bu səfərin yekunları üzrə hazırlanmış hesabat ilk növbədə elə həmin o beynəlxalq sənədin pozuntusudur və ölkəmizlə bağlı qəbul edilmiş qərar isə presedenti olmayan, indiyədək müvafiq mexanizmin ən yanlış addımıdır. "Tək Azərbaycanda deyil, bütövlükdə Avropa yurisdiksiyasında hüquqi çaşqınlıq yaradan və qeyd etdiyimiz kimi, presedenti olmayan belə bir addımın ardınca ortaya çıxan hüquqi suallar fonunda Avropa İttifaqının yenidən bu yanlışlığa bilərəkdən istinad etməsi və 2 ay əvvəl uğursuzluqla başa çatmış kampaniyanın təkrar dirçəldilməsinə yönəlik addımlar, təbii ki, bütövlükdə insan haqları, işgəncə, yaxud ləyaqəti alçaldan rəftar və ya cəzanın qarşısının alınması istiqamətində müsbət heç nə vəd etmir. Görünən odur ki, Avropa İttifaqı Avropa Şurasının adıçəkilən komitəsinin etdiyi kimi, insan haqları amilindən, xüsusən indiki halda insan ləyaqətini alçaldan rəftar və ya cəza kimi məsələlərdən siyasi məqsədlərlə istifadə etməkdə qərarlıdır. Bu komitənin qərəzli qərarına 2 ay sonra "məmnuniyyətlə" və "həvəslə" istinad edən Avropa İttifaqının səmimi niyyətinə o zaman şübhə etməzdik ki, bu təsisatların, xüsusən Aİ-nin üzvlərində, ələlxüsus bu birlikdə aparıcı mövqeyə sahib olmağa çalışan və bir sıra hallarda təsisatların qərarlarına birmənalı şəkildə təsir edən Fransa da bu qəbildən çoxsaylı cinayətlər və pozuntular törədilməsinə münasibət bildirəydi. Azərbaycan Xarici İşlər Nazirliyinin yaydığı bəyanatda da ifadə olunduğu kimi, Fransada "sarı jiletlilər" aksiyasında etirazçıların kütləvi şəkildə öldürülməsi, o cümlədən Parisin neokolonial siyasəti nəticəsində dənizaşırı ərazilərdə yerli əhaliyə qarşı işgəncələr, barəsində cinayət təqibi başlamış çoxsaylı faktlar fonunda rüşvətxorluq, korrupsiya hallarının yayılması, islamofobiya və müsəlmanlara qarşı hücum faktları, ötən il məhz fransız olmadığına görə Fransa vətəndaşlarının öldürülməsi faktları fonunda Avropa İttifaqı susursa, bu gün  həmin təsisatın təşkilata üzv olmayan bir dövlətdə vəziyyətlə bağlı hər hansı bəyanatı qəbuledilməz və gülüncdür", - deyə o əlavə edib
Ekspert qeyd edib ki, Avropa İttifaqının bəyanatı terrorçuları, xüsusən əli azərbaycanlıların qanına batmış və törətdikləri müharibə cinayətlərini, ekosid, urbisid və kultrasid əməllərini rəsmən etiraf etmiş şəxslərin müdafiəsini hədəfləyirsə, bu, əslində, təsisatın həmin cinayətlərə haqq qazandırdığı və cinayətkarları açıq formada dəstəklədiyi anlamına gəlir. Əslində, bu da bizi təəccübləndirmədi, çünki Azərbaycanın Vətən müharibəsindən sonra yaratdığı reallıqlar fonunda Qarabağda 2023-cü ilin sentyabr ayına qədər mövcud olmuş separatçı rejimin əsas maliyyə və hərbi təchizatçılarından biri məhz Avropa İttifaqı, xüsusən Fransa olmuşdu. Bu gün görünən reallıq ondan ibarətdir ki, Avropa İttifaqı qeyd olunan mövqeyini ifadə etməkdən çəkinmir və açıq şəkildə Ermənistanda baş qaldırmış revanşist niyyətlərin daha da təhrik olunması, bölgədə 4 il əvvələ qədər mövcud olmuş münaqişəli situasiyanın yenidən hakim status-kvoya çevrilməsi üçün "səylərini" əsirgəmir. Avropa İttifaqının bu mövqeyi bizim üçün təəccüblü deyil, lakin qlobal birliyin ləyaqətli üzvü kimi Azərbaycan insan haqları, demokratiya və digər təməl ümumbəşəri meyarların imperialist niyyətlər, habelə Fransa kimi neokolonialistlərin təcavüzkar maraqlarının alətinə çevrilməsini təhlükəli və yolverilməz hesab edir. Bu gün Avropa İttifaqının Ermənistanda insanların fundamental hüquq və azadlıqlarının pozulması, siyasi təqiblər, o cümlədən məhz fəaliyyətinə görə həbs edilən şəxslərin azadlıqdan məhrumetmə yerlərində həyatlarını itirməsi, ölkədə bir çox sferada açıq formada siyasi təqiblər fonunda susması, yaxud Ermənistanda insan haqları və demokratiya adına çoxsaylı pozuntuları görməzdən gəlməsi bir daha onu göstərir ki, bu təşkilat nə digər bir təsisatın insan haqları ilə bağlı bəyanatlarını dəstəkləmək, nə də özü müstəqil şəkildə bu istiqamətdə fikir söyləmək haqqına malikdir. 
B.Məhərrəmov vurğulayıb ki, Azərbaycanın suveren, tam müstəqil, regionda əsas diktəedici hərbi-siyasi gücə çevrilməsi Avropa İttifaqının, yaxud digər qərəzli beynəlxalq subyektin ölkəmizə münasibətdə təcavüzkar məqsədlərə xidmət edən hər hansı mövqeyi, bəyanatı, yaxud təzyiq cəhdini heçə endirir. Bu mənada Avropa İttifaqının 11 sentyabr tarixli qərəzli bəyanatını Avropa Şurasının müvafiq komitəsinin 3 iyul tarixli sənədi ilə eyni tale gözləyir.

Əsmər QARDAŞXANOVA,
"Azərbaycan"