Mingəçevir Şəhər İcra Hakimiyyətində 600-dən artıq bal toplayıb ali məktəblərə qəbul olunan yerli tələbələrlə görüş keçirilmişdir. 
Görüşdə çıxış edən şəhər icra hakimiyyətinin başçısı İlham İsmayılov qeyd etdi ki,  Azərbaycanda təhsil sahəsində aparılan islahatlar gənclərin təhsilə cəlb olunmasına, təhsil sahəsində kadr problemlərinin həllinə və müəllim peşəsinin nüfuzunun daha da yüksəlməsinə müsbət təsirini göstərir: "Müəllim cəmiyyətin gələcəyinin yaradıcısıdır. Ümummilli Lider Heydər Əliyev müəllim peşəsinə və əməyinə həmişə yüksək qiymət verib. Ulu Öndərin Azərbaycana rəhbərliyi illərində ölkəmizdə yüzlərlə yeni məktəb binası, uşaq bağçası tikilib istifadəyə verilib. Sevindirici haldır ki, müəllimin əməyinə bu gün də Azərbaycan Prezidenti İlham Əliyev tərəfindən yüksək qiymət verilir, bu peşə sahiblərinin sosial rifahının yaxşılaşdırılması üçün davamlı tədbirlər həyata keçirilir". 
Heydər Əliyev Fondunun yarandığı ilk gündən təhsil sahəsində müxtəlif layihə və proqramlar həyata keçirdiyini deyən İ.İsmayılov  fondun "Yeniləşən Azərbaycana yeni məktəb" proqramının əsas məqsədinin təhsil sahəsində mövcud olan problemlərin həllinə kömək etmək, ölkə miqyasında müasir standartlara cavab verən təhsil kompleksləri yaratmaq, tədrisin səviyyəsinə bilavasitə təsir edən problemləri aradan qaldırmaq olduğunu diqqətə çatdırdı. 
Mingəçevir şəhərindəki təhsil ocaqlarında da ötən illər ərzində müsbət dəyişikliklər olub. Belə ki, bir sıra orta məktəb binaları yenidən tikilib və ya əsaslı təmir olunub, müasir avadanlıqlarla təchiz edilib. Dövlət proqramı çərçivəsində şəhərdə 2351 şagirdlik 4 ümumtəhsil məktəb binası inşa, 11158 şagirdlik 12 məktəb binası əsaslı təmir olunub. Hazırda 1250 şagirdlik 17 saylı tam orta məktəbin binasında əsaslı təmir işləri aparılır. Bu il şəhər ümumtəhsil məktəblərini 1165 nəfər bitirmişdir. Onlardan 426 nəfər ali məktəblərə, o cümlədən 41 nəfər Qarabağ Universitetinə qəbul olmuşdur. Ali məktəbə qəbul olan tələbələrdən 150 nəfəri 500-dən, 46 nəfəri 600-dən yuxarı bal toplamışdır. Şəhər üzrə ən yüksək nəticəni Təbiət-Riyaziyyat və Humanitar Elmlər təmayüllü liseyin şagirdi Aysel Səlimova  (684 bal) göstərmişdir. 
Tədbirin sonunda yüksək bal toplayan məzunlara - tələbələrə şəhər icra hakimiyyətinin hədiyyələri təqdim olunmuşdur.

Lazım QULİYEV,
"Azərbaycan"